Xüsusi təyinatlı şəhidimiz leytenant Niftəliyev İlyas Güloğlan oğlunun doğum günüqeyd olundu.

12 aprel 2022-ci il tarixdə Xüsusi Təyinatlı Qoşunların zabiti şəhid Niftəliyev İlyas Güloğlan oğlunun doğum günü doğulduğu, boya başa çatdığı Qusar rayonunun Bədirqala kəndində qeyd olunub.  Anım mərasimində iştirak edənlər qəhrəman şəhidimizin keçdiyi həyat yolundan bəhs ediblər, ruhuna böyük ehtiram göstəriblər. Tədbirdə Qusar Rayon İcra Hakimiyyətinin başçısı Şair Alxasov, rayonun hüquq mühafizə orqanlarının rəhbərləri, Səfərbərlik və Hərbi Xidmətə Çağırış üzrə Dövlət Xidmətinin Qusar rayon şöbəsinin əməkdaşları,  idarə və müəssisə rəhbərləri, kənd sakinləri, doğmaları, ailə üzvləri iştirak etmişdir.Doğum günü tədbiri şəhidin məzarının ziyarəti ilə başlanmış, məzarı üzərinə gül dəstələri düzülmüş, ruhuna dualar oxunmuşdur. Daha sonra şəhidin ailəsi ziyarət olunaraq onları narahat edən məsələlər ətrafında söhbət aparılmışdır. Prezident İlham Əliyevin müvafiq sərəncamına əsasən ərazilərimizin işğaldan azad olunması uğrunda aparılan hərbi əməliyyatlarda iştirak edərək igidlik və şücaət göstərmiş, döyüş tapşırıqlarını uğurla yerinə yetirərək Vətən müharibəsi zamanı şəhidlik zirvəsinə yüksəlmiş şəhidimiz Niftəliyev İlyasın Güloğlan oğlunun “Kəlbəcərin azad olunmasına görə” medalı ailəsinə təqdim olundu. Torpaqlarımızın işğaldan azad edilməsi uğrunda gedən Vətən müharibəsində qəhrəmancasına döyüşərək şəhidlik zirvəsinə ucalmış şəhid Niftəliyev İlyas Güloğlan oğlu Azərbaycan Respublikasının Prezidenti İlham Əliyevin sərəncamına əsasən ölümündən sonra “Azərbaycan bayrağı” ordeni, “Vətən uğrunda”, “Füzulinin azad olunmasına görə”, “Cəbrayılın azad olunmasına görə”, “Hərbi xidmətdə fərqlənməyə görə", “Kəlbəcərin azad olunmasına görə” medalları ilə təltif olunub. Şəhidin yaxın qohumları şəhid ailələrinə göstərilən diqqət və qayğıya görə ölkə rəhbərliyinə minnətdarlığını ifadə etmişdir.