Aprel döyüşləri: tarixi zəfərin başlanğıcı
2016-cı ilin aprel döyüşləri böyük zəfərin başlanğıcı kimi tarixə düşmüşdür. Azərbaycan Ordusunun qələbəsi ilə nəticələnən döyüşlər nəticəsində Tərtər rayonunun Talış kəndi ətrafındakı yüksəkliklər, Cəbrayıl rayonunun Lələtəpə yüksəkliyi və Cocuq Mərcanlı, Goranboy rayonunun Gülüstan kəndi və Tərtər rayonunun Madagiz kəndi istiqamətində bəzi mövqelər düşməndən azad olundu. Bununla da cinayətkar erməni rəhbərlərinin keçilməz erməni səngərləri haqqında mifi alt-üst edildi. Aprel döyüşləri bütün dünyaya Azərbaycan Ordusunun gücünü, qələbə əzmini, ədalətin bərpa olunacağını göstərdi.
Aprelin 2-də Qusar rayonu Cağarqışlaq kənd tam orta məktəbində “Mübarizə və vətənpərvərlik ruhunun qələbəsi: Aprel döyüşləri” mövzusunda seminar keçirilmişdir. Əvvəlcə şəhidlərimizin xatirəsi bir dəqiqəlik sükutla yad edilmişdir. Tədbirdə aprel döyüşlərinin şəhidi Xeyirbəyov Əmiraslan Xəlil oğlunun atası Xəlil Xeyirbəyov , Qusar Rayon İcra Hakimiyyətinin əməkdaşı Kamran Sədullayev, Dini Qurumlarla İş Üzrə Dövlət Komitəsinin Quba-Xaçmaz regional bölməsinin əməkdaşı Mehman Məmmədov, məktəbin pedaqoji kollektivi və şagirdlər iştirak ediblər. Tədbirdə çıxış edən natiqlər Aprel döyüşlərinin əhəmiyyətindən, Vətən oğullarının müqəddəs torpaqlarımız uğrunda göstərdikləri şücaətlərdən, Qusar rayonundan olan Aprel döyüşləri şəhidi Xeyirbəyov Əmiraslan Xəlil oğlunun şərəfli döyüş və həyat yolundan bəhs edərək, tədbir iştirakçılarına ətraflı məlumat veriblər.
Əmiraslan Xeyirbəyov 10 dekabr 1996-cı ildə Qusar rayonunun Caqarqışlaq kəndində anadan olub. Əsgər Əmiraslan Xeyirbəyov 2016-cı ilin aprel ayında Azərbaycan-Ermənistan təmas xəttində baş verən atışma zamanı qəhrəmancasına şəhid olub. Aprelin 9-u isə doğulduğu Qusar rayonunun Caqarqışlaq kəndində dəfn olunub. Ölümündən sonra Əmiraslan Xeyirbəyov döyüşlərdə göstərdiyi qəhrəmanlığa görə Azərbaycan Respublikasının Prezidenti İlham Əliyevin sərəncamı ilə "Hərbi xidmətdə fərqlənməyə görə" III dərəcəli medalı ilə təltif edilib.
