Əhali ilə görüşlər və səyyar qəbullar müntəzəm xarakter alıb
Vətəndaşların gündəlik qayğılarının öyrənilməsi, onları narahat edən problemlərin yerində araşdırılması, qaldırılan məsələlərin həllinə nail olunması məqsədilə RİH başçısı tərəfindən mütəmadi olaraq yerlərdə səyyar qəbullar keçirilir.
İcra başçısının növbəti səyyar qəbulu rayonun Həsənqala kəndində baş tutub. Görüşdən əvvəl şəhidlərimizin xatirəsi 1 dəqiqəlik sükutla yad edilib. Hüquq mühafizə orqanlarının rəhbər şəxsləri, Rayon İcra Hakimiyyətinin məsul əməkdaşlarının, idarə, müəssisə, təşkilat rəhbərləri və kənd sakinlərinin iştirakı ilə baş tutan görüşdə sakinlərin müraciətləri dinlənildi, onlara müvafiq izahatlar verildi.
Səyyar qəbul zamanı sakinlər yeni salınmış məhəllənin, uşaq bağçası və tibb məntəqəsinin mavi yanacaqla təminatı, istismara yararsız elektrik dirəklərinin dəyişdirilməsi, 1 km-lik çınqıl əsaslı Balaqusar-Həsənqala yolunun asfaltlanması, avtobus dayanacağının və təhlükəsizliyin təmin olunması məqsədilə yol nişanlarının quraşdırılması ilə bağlı müraciətlərini ediblər.
RİH başçısı qaldırılan problemlərin həlli ilə bağlı aidiyyəti üzrə tapşırıqlarını verib. Sakinlər onlara göstərilən diqqət və qayğıya görə rayon rəhbərinə minnətdarlıqlarını bildiriblər.
Görüşdən sonra icra başçısı Həsənqala kənd tam orta məktəbin vəziyyəti ilə tanış olub. Şagirdlərin təhsil göstəriciləri, eləcə də məktəbin texniki təchizat məsələləri ilə maraqlanıb.
