İcra başçısı məhəllə görüşündə sakinlərin problem və təkliflərini dinləyib

Qusar rayon İcra Hakimiyyətinin başçısı Sahir Məmmədxanovun şəhərin yeni yaşayış massivinin və ətraf küçələrin sakinləri ilə növbəti məhəllə görüşü Qusar şəhər 3 saylı tam orta məktəbin akt zalında baş tutmuşdur. Tədbirdə həmçinin RİH başçısı Aparatının məsul şəxsləri, hüquq-mühafizə orqanlarının, idarə, müəssisə, təşkilat və xidmət sahələrinin rəhbərləri iştirak ediblər.

Sakinləri salamlayan rayon rəhbəri onların təklif və müraciətlərini dinləmək istədiyini bildirmiş, eyni zamanda son aylarda rayonun ayrı-ayrı kəndlərində və Qusar şəhərində görüldüyü işlər barəsində geniş məlumat vermişdir.

 Sakinlər küçələrin asfaltlanması, yaşadıqları məhəllədə aptekin açılması, piyada səkilərin qoyulması, istismara yararsız elektrik dirəklərinin təmiri kimi aktual problemləri qaldırıblar. Həmçinin işlə təminat, yaşayış evlərinin sənədləşmə işlərinə köməklik göstərilməsi ilə bağlı müraciətlərini ediblər. Şəhər ərazisində uşaq bağçalarının az olması işləyən valideynlər üçün problemlərə səbəb olması və ona görə şəhərdə əlavə uşaq bağçasının açılmasına ehtiyac olduğu qeyd olunub.

İcra başçısı Sahir Məmmədxanov qəbul zamanı müraciət edən rayon sakinlərini dinləyərək onların problemlərinin aradan qaldırılmasına dair RİH əməkdaşlarına və müəssisə rəhbərlərinə bir sıra tapşırıqlar verdi. Bəzi məsələlər yerindəcə həll edildi, icrası vaxt tələb edən müraciətlər isə araşdırılaraq həll edilməsi üçün icraata götürüldü.

Sakinlər onlara göstərilən diqqət və qayğıya, probleminin həlli istiqamətində görülən işlərə görə rayon rəhbərliyinə öz minnətdarlıqlarını bildiriblər.