Multikulturalizm və tolerantlıq nümunəsi
27 noyabr 2024 | 17:19
Azərbaycan müxtəlif etnosların və millətlərin, fərqli dinlərə sitayiş edən insanların tarixən dostluq və qardaşlıq şəraitində yaşadığı tolerant ölkədir. Ölkəmizdə ayrı-ayrı etiqad və inanclara malik etnosların əmin-amanlıq şəraitində yaşamasında, etnik mədəni müxtəlifliyin günümüzədək qorunub saxlanmasında Azərbaycan xalqına xas olan humanizm və çoxmillətlilik dəyərlərinin müstəsna rolu vardır.
Ölkəmizdə bütün dinlərə və millətlərə dünyanın bir çox dövlətləri üçün nümunə hesab olunacaq səviyyədə tolerant münasibət bəslənildiyi kimi Qusar rayonunda da dini etiqad və əqidə azadlığı tam təmin edilir. Tolerantlıq prinsipləri gündəlik həyatda da təmin olunur, qorunur.
Kommunal Müəssisələr Kombinatının işçiləri tərəfindən Qusar rayonunun ərazisində yerləşən Rus Pravoslav Qəbiristanlığında iməcilik keçirilərək təmizlik işlərinin aparılması bu fikrin əməldə təsdiqinin göstəricisidir.
İməcilik tədbiri çərçivəsində qəbiristanlıq ərazisi kollu bitkilər, qurumuş alaq otları və yarpaqlardan təmizlənib, tullantıların ərazidən daşınması təmin edilib, məzarların ətrafı səliqəyə salınıb. Rus Pravoslav Qəbiristanlığında təmizlik işlərinin aparılması sakinlər tərəfindən də təqdirəlayiq addım kimi qiymətləndirilib.
Qeyd edək ki, rayon ərazisində mütəmadi olaraq keçirilən iməciliklər və təmizlik işləri şəhərin təmizliyinin qorunub saxlanması və vətəndaşların maarifləndirilməsi məqsədini daşıyır.
Keçidlər
