Qusar Rayon İcra Hakimiyyəti başçısı yanında Şuranın geniş iclası keçirildi

Fevralın 19-da Qusar Rayon İcra Hakimiyyətində növbəti Şura iclası keçirilib. İclasda RİH başçısı yanında Şuranın üzvləri, hüquq-mühafizə orqanlarının rəhbərləri, idarə, müəssisə, təşkilat rəhbərləri, ərazi icra nümayəndələri və bələdiyyələr iştirak ediblər.
Şura iclasında 2025-ci ilin “Ərazi Məşğulluq Proqramı” və Qusar rayonunun kənd təsərrüfatı sahəsində 2024-cü il ərzində görülmüş işlər, mövcud vəziyyət, kənd təsərrüfatı təyinatlı texnika ilə təminat, qazanılan nailiyyətlər, problem və çatışmazlıqlar müzakirə olunub.
İclasda 2025-ci ilin məşğulluq proqramı ilə əlaqədar 2024-cü ildə əmək bazarının təhlili və proqnozu aparılıb, 2024-cü ildə əmək bazarında mövcud olmuş vəziyyət, əmək ehtiyatlarının balansı, işaxtaran və işsiz şəxslərin sosial müdafiəsinin əsas istiqamətləri, onların münasib işlə təmin edilmələri, peşə hazırlığı kurslarının və haqqı ödənilən ictimai işlərin təşkil edilməsi, işsizlikdən sığorta ödənişinin təyin olunması, kvota üzrə sosial müdafiəyə xüsusi ehtiyacı olan vətəndaşların işlə təmin olunması, özünüməşğulluq proqramı kimi məsələlər ətrafında fikir mübadiləsi aparılıb. Həmçinin işaxtaran və işsiz şəxslərin sosial müdafiəsi ilə bağlı həyata keçirilən tədbirlər və qarşıda duran vəzifələr barədə iclas iştirakçılarına məlumat verilib.
Şura iclasında müzakirə olunan digər bir mövzu isə Qusar rayonunun kənd təsərrüfatı sahəsində 2024-cü il ərzində görülmüş işlər, mövcud vəziyyət, qazanılan nailiyyətlər, problem və çatışmazlıqlar ilə bağlı olub.
Yekunda aparılmış müzakirələr nəzərə alınmaqla müvafiq qərarlar qəbul edilib. RİH başçısı Şurada qəbul edilən qərarların icrasına məsuliyyətlə yanaşılması və nəzarətdə saxlanılmasına dair tapşırıq və tövsiyələrini bildirib.