Qusar rayonunda əmək yarmarkası təşkil edilib
19 noyabr 2024 | 18:15
Noyabrın 19-da Qusar rayonu Heydər Əliyev Mərkəzində Quba-Xaçmaz Regional Məşğulluq filialının Qusar rayon xidmət şöbəsinin təşkilatçılığı ilə əmək yarmarkası təşkil olunub. Əmək yarmarkasında “Şahdağ” Turizm Mərkəzi tərəfindən 156 vakansiya təqdim edilib. 300-dən çox vətəndaşın iştirakı ilə baş tutan yarmarkada vakansiyalar üzrə müraciət edən 116 işsiz və işaxtaran şəxslərdən CV-lər qəbul edilərək nəzərdən keçirilib. Onların həmin vakansiyalar üzrə məşğulluqlarının təmin edilməsi üçün işlərə başlanıb. Yarmarkada iştirakçılara özünüməşğulluq proqramı, əmək bazarının tələblərinə uyğun yeni peşələrə yiyələnmək istəyən şəxslərə isə peşə hazırlığı, əmək bazarı və mövcud peşələr, vakansiyalar barədə məlumat verilib.
Əmək yarmarkasının keçirilməsində əsas məqsəd işəgötürənlərlə işsiz şəxslərin birbaşa təmasını yaratmaq, işaxtaran vətəndaşları mövcud vakansiyalar barədə məlumatlandırmaq, əmək bazarında mövcud olan tələb və təklif əsasında əhalinin məşğulluğunun təmin olunması, işəgötürənlərin qısa müddət ərzində zəruri peşəyə, ixtisas və təcrübəyə malik olan kadrların seçiminə köməklik göstərilməsidir.
Qusar rayonunda vaxtaşırı olaraq bu cür yarmarkaların keçirilməsi məşğulluq probleminin uğurlu həlli, işaxtaranlar üçün uyğun təcrübə imkanlarının yaradılmasının təmin edilməsi, savadlı, peşəkar və təcrübəli gənclərin ixtisasyönümlü karyerasının dəstəklənməsi baxımından mühüm əhəmiyyətə malikdir.
Keçidlər
