Qusar rayonunda “Gələcəyimiz üçün hərəmiz bir ağac əkək!” devizi altında ağacəkmə aksiyaları davam etdirilir
Azərbaycan Respublikasında 2024-cü ilin “Yaşıl Dünya naminə həmrəylik ili” elan edilməsi haqqında Azərbaycan Respublikası Prezidentinin Sərəncamına uyğun olaraq Qusar rayonunda ağacəkmə aksiyaları davam etdirilir.
Aksiya çərçivəsində Qusar-Xudat magistral avtomobil yolunun kənarında 320 ədəd Eldar şamı ağacı əkilib. Ekoloji sağlamlığın və ətraf mühitin qorunması məqsədi ilə salınan yaşıllıq zonalarında ağaclar aqrotexniki qaydalara uyğun əkilmişdir.
Qeyd edək ki, “Gələcəyimiz üçün hərəmiz bir ağac əkək!” devizi altında bu günədək rayon ərazisindən keçən magistral avtomobil yollarının kənarlarında yerli iqlimə uyğun olaraq 22000-dən artıq ağac əkilib.
Ətraf mühiti qorumaq, ekoloji tərbiyəni gücləndirmək, biomüxtəlifliyi inkişaf etdirmək məqsədilə rayon ərazisində keçirilən aksiyaların, yaşıllıqlara qulluq və abadlıqla bağlı tədbirlərin bundan sonra da davam etdirilməsi nəzərdə tutulur.
