Qusarda Yeni Azərbaycan Partiyasının təsis edilməsinin 32-ci ildönümü qeyd olunub
21 noyabr 2024 | 17:48
Qusar rayon Heydər Əliyev Mərkəzində Yeni Azərbaycan Partiyasının təsis edilməsinin 32-ci illiyinə həsr olunmuş tədbir keçirilib.
Əvvəlcə tədbir iştirakçıları Ulu Öndər Heydər Əliyevin abidəsini ziyarət edərək önünə gül dəstələri qoyublar.
Qusar Rayon İcra Hakimiyyətinin başçısı Sahir Məmmədxanov, YAP Qusar rayon təşkilatının sədri David İbramxəlilov, idarə, müəssisə rəhbərləri, ictimaiyyət nümayəndələri, partiya fəallarının iştirakı ilə keçirilən tədbirdə Dövlət Himni səsləndirilib, Ulu Öndər Heydər Əliyevin və torpaqlarımızın azadlığı uğrunda canlarını qurban vermiş şəhidlərimizin xatirəsi bir dəqiqəlik sükutla yad edilib.
Tədbiri giriş sözü ilə açan YAP Qusar rayon təşkilatının sədri David İbramxəlilov partiyanın keçdiyi yoldan, Heydər Əliyev irsinin təntənəsindən və partiya sədri İlham Əliyev tərəfindən bu irsin layiqincə davam etdirilməsindən danışıb. David İbramxəlilov qeyd edib ki, 32 illik şərəfli inkişaf yolu keçən YAP ümumxalq partiyasına çevrilərək ötən illər ərzində ölkəmizdə siyasi sabitliyin və davamlı inkişafın təminatçısı kimi çıxış edib.
Qusar Rayon İcra Hakimiyyətinin başçısı Sahir Məmmədxanov çıxışında Yeni Azərbaycan Partiyasının yaranmasında və inkişafında Ulu Öndər Heydər Əliyevin gərgin əməyini vurğulayaraq partiyanın dövlət siyasətində aparıcı mövqeyindən danışıb. RİH başçısı qeyd edib ki, tarixi zərurətdən yaranan Yeni Azərbaycan Partiyası (YAP) ölkəmizin siyasi həyatında qurtuluş və tərəqqinin simvoluna çevrilib.
Partiya veteranı Arif Xəlilov və gənc fəal Könül Butayeva partiyanın yaranma tarixi, gənclərə göstərilən diqqət və qayğıdan danışıblar. Partiyanın sədri, Prezident İlham Əliyevin müxtəlif dövrlərdə prezident seçkilərində ən yüksək göstəricilərlə qalib gəlməsinin partiyanın nüfuzunun sübutu olduğu qeyd edilib.
Tədbirin sonunda rayonun ictimai-siyasi həyatında fərqlənən bir qrup partiya fəalına Fəxri fərmanlar və qiymətli hədiyyələr, partiya sıralarına yeni qəbul olunmuş gənc partiya üzvlərinə isə üzvlük vəsiqələri təqdim olunub.
Sonda Yeni Azərbaycanın Partiyasının himni səsləndirilib.
Keçidlər
