Qusarda yerli ziyalılarla görüş keçirilib
04 noyabr 2024 | 17:57
Qusarda rayonun tanınmış elm adamları və alimləri ilə görüş keçirilib. Rayon Heydər Əliyev Mərkəzində baş tutan görüşdə RİH başçısı Sahir Məmmədxanov belə görüşlərin keçirilməsində əsas məqsədin Qusar ziyalıları ilə yaxından tanış olmaq olduğunu qeyd edib.
Görüşdə Qusar rayonunda aparılan abadlıq-quruculuq işləri, sosial, iqtisadi, ictimai, mədəni və digər sahələrdə icra olunan layihələr müzakirə olunub, bu layihələrin həlli istiqamətində birgə çalışmağın vacibliyi vurğulanıb. Rayonun nüfuzunun artırılması və gələcək inkişafı istiqamətində yerli ziyalıların təklif və tövsiyələri dinlənilib, əlavə fikirləri öyrənilib. Onların rayonumuzun ictimai-siyasi həyatında yaxından iştirak etmələri, Qusar rayonunun inkişafı, yüksəlişi üçün öz təcrübələrini əsirgəməmələri təqdirəlayiq hesab olunub.
Görüşdə ziyalılar tərəfindən rayonun sosial-iqtisadi sahəsinin inkişafı istiqamətində təkliflər irəli sürülüb, Yazıçılar Birliyinin filialının açılması, yeni teatr binasının tikilməsi, Tarix Diyarşünaslıq Muzeyində yenidənqurma işlərinin aparılması, gənclərin asudə vaxtlarını səmərəli şəkildə keçirmələri üçün stadionların tikintisi kimi məsələlər qaldırılıb, rayonda mədəni mühitin dirçəlməsinə diqqətin artırılması xahiş olunub. RİH başçısı qeyd olunan məsələlərin həlli ilə bağlı qanunamüvafiq qaydada işlərin aparılacağını qeyd edib.
İki saatdan çox çəkən görüş səmimi və qarşılıqlı polemika şəraitində keçib. Sonda belə görüşlərin davamlı olacağı bildirilib.
Keçidlər
