Suvacal kəndində səyyar qəbul keçirildi
Qusar rayon İcra Hakimiyyəti başçısı tərəfindən vətəndaşların qəbulu, onlarla mütəmadi olaraq keçirilən görüşlərin əsas məqsədi vətəndaşların problemlərinin operativ şəkildə həll olunmasıdır.
Bu qəbildən olan növbəti səyyar görüş rayonun Xuray İnzibati Ərazi Dairəsinə daxil olan Suvacal kəndində baş tutub. Rayon İcra Hakimiyyətinin başçısı, RİH başçısı Aparatının məsul şəxsləri, idarə, təşkilat, xidmət sahələrinin rəhbərləri, müvafiq kənd inzibati ərazi dairəsi üzrə nümayəndə, bələdiyyə və kənd sakinlərinin iştirakı ilə baş tutmuş görüşdə vətəndaşlar öz problem və təkliflərini səsləndiriblər.
Görüşdə sakinlər suvarma və içməli su çatışmazlığından çətinlik çəkdiklərini bildirərək, istismara yararsız elektrik dirəklərinin dəyişdirilməsi, yaşayış evinin tikintisi üçün torpaq sahəsininin ayrılması, işlə təmin olunma və digər məsələlərlə bağlı müraciətlərini ediblər.
Qəbul zamanı vətəndaşların müraciətləri dinlənilib, həlləri ilə bağlı müvafiq qurumlara tapşırıqlar verilib.
Daha sonra Suvacal kənd tam orta məktəbində olan İcra başçısı məktəbin fəaliyyəti, cari vəziyyəti ilə tanış olub, şagirdlərin təhsil göstəriciləri ilə maraqlanıb.
