Vətən müharibəsi şəhidinin doğum günü münasibətilə tədbir keçirilib
02 aprel 2025 | 18:03
Qusar rayon Heydər Əliyev Mərkəzində şəhid Ağa Ağayevin doğum günü ilə bağlı tədbir keçirilib. Tədbirdə şəhid ailələri, Qusar Rayon İcra Hakimiyyətinin əməkdaşı, mədəniyyət işçiləri və şagirdlər iştirak ediblər.
Tədbirdə çıxış edən natiqlər şəhidin döyüş yolundan bəhs edərək, milli-mənəvi birliyimizin, Vətən oğullarının doğma el-obaya sədaqətinin təcəssümü olan 44 günlük Vətən müharibəsində qazanılan parlaq Qələbənin əhəmiyyətindən danışıblar. Qeyd edilib ki, güc, iradə, cəsarət və Vətən sevgisindən yaranan ruh yüksəkliyi Böyük Qələbənin təmin olunmasında əsas faktorlardan biri olub.
Tədbir Qusar şəhəri 4 saylı tam orta məktəbin şagirdlərinin ifasında ədəbi-bədii kompozisiya və şəhidin həyat yolundan bəhs edən videoçarxın nümayişi ilə başa çatıb.
Azərbaycan Ordusunun əsgəri olmuş Ağa Ağayev 4 aprel 2001-ci ildə Qusar rayonu Yeni Həyat kəndində anadan olub. II Qarabağ müharibəsi zamanı torpaqlarımızın ərazi bütövlüyü uğrunda savaşıb, oktyabrın 23-də şəhid olub. 24 oktyabr 2020-ci ildə Qusar rayonu Yeni Həyat kəndində dəfn olunub. Döyüşlərdə göstərdiyi şücaətlərinə görə ölümündən sonra "Suqovuşanın azad olunmasına görə" medalı, "Laçının azad olunmasına görə" medalı, "Vətən uğrunda" medalı ilə təltif olunmuşdur.
Keçidlər
