İnfrastruktur

Qusarın yol infrastrukturunda xeyli işlər görülmüşdür. Belə ki, son illər ərzində rayon ərazisində Həzrə-Samur, Həzrə-Zuxul, Qusar-İmamqulukənd, Qusar-Ləzə, Qusar-Xudat istiqamətlərində əsas avtomobil yolları əsaslı şəkildə yenidən qurulmuş, Bakı-Rusiya Federasiyası Dövlət sərhəddi avtomobil yolunda isə əsaslı tikinti işləri hazırda davam etdirilməkdədir. Qusar şəhərinin küçələri su-kanalizasiya sistemləri yenidən qurulduqdan sonra əsaslı şəkildə təmir olunmuş və tikinti zamanı qazılmış yolların böyük hissəsi asfaltlanmışdır. Həmin küçələrdə səkilər quraşdırılmış, yol kənarı işıqlandırma sistemləri, elektrik və rabitə xətləri qaydaya salınmışdır. Artıq bir neçə ildir ki, yeni avtobuslar gətirilməklə şəhərdaxili sərnişin daşınmasında olan problemlər aradan qaldırılmışdır.

Rayon əhalisinin içməli su, kanalizasiya, elektrik enerjisi, təbii qaz və digər təlabatlarının ödənilməsi üçün sistemli şəkildə tədbirlər həyata keçirilir. Təkcə son zaman kəsiyində Qusar şəhərində içməli su və kanalizasiya şəbəkəsinin yenidən qurulması, Hil kəndində yeni içməli su xətlərinin istifadəyə verilməsi, Suvacal kəndinə təbii qazın verilməsi, Qusar-Xudat avtomobil yolunun əsaslı təmiri, Qusar şəhər 2 saylı uşaq bağçasının ikinci korpusunun əsaslı təmiri və digər tədbirlər həyata keçirilmişdir.